Castro Rodríguez, Domingo-Antonio

Mariñeiro, 22 anos. Veciño de Santa Uxía do Ézaro, Dumbría.

Fuxido. Encarcerado.

Despois de permanecer agochados no Monte Pindo durante máis dun ano, o sábado 16/10/1937 un grupo de 13 persoas de Carnota e Dumbría decidiron facerse coa motora O As de Sel, propiedade de Antonio Sel, e escapar da guerra e da represión a que os sometían os fascistas a eles e aos familiares e veciños. Baixaron ao porto do Sinal e fixéronse co barco despois de ameazar á tripulación a punta de pistola. Incautaron combustible e provisións en Corcubión e Fisterra e, no medio do temporal, puxeron rumbo a Inglaterra; aos dous días auxiliounos e remolcounos o vapor inglés SS Strib ata Bristol (Inglaterra). As autoridades inglesas, polo Pacto de no Intervención, devolvéronos a Cataluña, a través de Francia, e tiveron que loitar no exército republicano.

Os 13 fuxidos eran o veciño de Santa María de Lira, Carnota (A Coruña) Manuel Caamaño González e os de San Clemente do Pindo, Carnota: Ángel Casais Caamaño; Luis Casais Casais, estudante; José-Joaquín Casais Piñeiro; José Piñeiro Casais; Manuel Piñeiro López; os irmáns Alfredo Piñeiro Riveiro e Constantino Piñeiro Riveiro. Tamén fuxiron os veciños do Ézaro, Domingo-Antonio Castro Rodríguez, Manuel-Francisco Ferrer Gándara, Manuel Lago Sambade e os irmáns Manuel Rodríguez Louro e Joaquín Rodríguez Louro.

O Catelo foi o organizador e cabeza visible desta fuxida.

A moitos deles procesáronos en Ferrol (A Coruña), na causa 474/37, o día 20/11/1937, polos delitos de piratería, roubo e rebeldía.

De Inglaterra pasa a Francia e logo entra en España. Combate no exército republicano ata que o capturan as forzas franquistas.

Xulgado en consello de guerra en Ferrol polo delito de deserción co resultado de ser declarado fuxido e en rebeldía.

O plan de fuxida do Catelo e dos once homes que fuxiron con el tardou un ano en concretarse. Desde o alto do monte Pindo divisaban nas Illas Lobeiras, fronte a Carnota, dous barcos que pescaban na zona. No verán de 1937 baixaron ao porto do Pindo e a punta de pistola asaltaron o buque conserveiro O As. Chegaron a Bristol e Inglaterra, polo Pacto de no Intervención, devolveunos a España, á zona republicana.

Xulgado de novo en 1941 en consello de guerra en Ferrol polo delito de auxilio á rebelión co resultado de sentenza a 12 anos de prisión.

Puxérono en liberdade condicional en 1942.

Logo de pasar unha longa estadía no cárcere, morreu de pulmonía.