Pita Armada, Antonio

Toneleiro, 27 anos. Casado; tivo polo menos un fillo: Antonio Pita Núñez. Veciños de Cariño. Fillo de Luis Pita e Asunción Armada, eran 11 irmáns. Tres dos seus irmáns eran significados líderes da CNT en Cariño, Vicente Pita Armada, fuxido no Arkale e exiliado en Chile, Manuel Pita Armada e José Pita Armada, tamén fuxidos no Arkale.

Militante da CNT e do Sindicato da Industria Pesqueira (SIP) de Cariño.

Paseado.

Despois do triunfo da sublevación varios dos seus irmáns e outros veciños de Cariño participaron na evasión do boniteiro Arkale; Antonio, Manuel-Francisco e Luis negáronse a fuxir e quedaron en Cariño coas súas familias porque non fixeran nada malo a ninguén.

Os rebeldes detivérono xunto aos seus irmáns Luis Pita Armada e Manuel-Francisco Pita Armada, porque eran os irmáns de dous destacados militantes da CNT de Cariño; aos tres fusiláronos en Ferrol o 6 de setembro de 1936.

Morte rexistrada nos muros do cemiterio de Canido, na cidade de Ferrol, por mor de feridas producidas por arma de fogo a mans da forza pública franquista.

O día 6 de setembro fusilaron en Ferrol os seguintes veciños de Cariño: Francisco Anido Pérez, chofer; José Casal Casas, mariñeiro; Jesús Díaz Pérez, mariñeiro; Francisco Novo Lozano; Adelino Pérez Breijo; os irmáns Antonio Pita Armada, toneleiro; Luis Pita Armada, mariñeiro, e Manuel-Francisco Pita Armada, industrial; Jesús Quiza Picos, mariñeiro; Modesto Senra Martínez, albanel; José-Antonio Timiraos, mariñeiro.