Rodríguez Gómez, Pedro

Zoqueiro, 20 anos. Casou con Josefa Regos del Río. Tocou o clarinete na banda de música de Ordes.

Militante do PCE.

Fuxido. Encarcerado.

Detido pola Brigada de Investigación e Vixilancia da Garda Civil, o día 04/05/1946, acusado de simpatizante comunista e de escoitar Radio Moscova.

Deixárono en liberdade tres días despois e únese á guerrilla antifranquista.

Participou con Antonio Nouche Costa, Dourado Xaneiro, o Soldado de Deixebre; Claudio Díaz Milia; José Remuiñán Barreiro, Ricardito, Simeón; José Blanco Núñez, Ferreirín, Pepito, e José Santiago Temprano, Henares, Hornaca, na sanción económica de 30.000 pesetas imposta ao alcalde franquista de Cerceda (A Coruña).

Pertencía ao Destacamento Santiago Álvarez.

Por este destacamento pasaron: Benigno Andrade García, Foucellas; Pedro Calvete Brea; José-Antonio Cortiñas Blas, Fondista, M. Vega; Francisco Cousillas Pombo; José Dasilva Bartomeu, Moreno, Manolete; Manuel Díaz Pan, Rogelio, Casado; Lisardo Freijo López, Tenente Freixo; José Galán Núñez, Dereito, Miguel; e no que tamén se integraban Samuel Mayo Méndez, Saúl das Olas, Pelayo, Raúl, Alicantino; Ramiro Martínez López, Zapateiro; Manuel Pena Camino, Flores, Dios; Emilio Pérez Vilariño, Claudio Beas, Emilio; Manuel Ramiro Souto; Francisco Rey Balbís, Moncho; Marcelino Rodríguez Fernández, Marrofer, Valentín, Asturiano, Chispa; Pedro Rodríguez Gómez; José Santiago Temprano, Henares, Hornaca; Jesús Valeiro Gómez, Antonio, Calias, e José Vázquez Mauriz, Patitas.

O día 26/06/1946 resultou ileso nun tiroteo coa Garda Civil na Chousa de Urzal, Cestaños, Santa Mariña de Parada, Ordes. No enfrontamento morreu Antonio Recouso Boquete e con feridas José Blanco Núñez, José Santiago Temprano e Enrique Ferreirós Candamo. O ataque debeuse a unha delación do infiltrado Claudio Díaz Milia.

Deixou a guerrilla o día 09/07/1946 e marchou á súa casa, onde permaneceu un ano.

Detivérono na Coruña o 19 de xullo de 1947.

Xulgado en consello de guerra sumarísimo na Coruña o día 04/11/1948 polo delito de “auxilio a malhechores”, na causa 400/47, co resultado de sentenza a cadea perpetua.

O tribunal militar condenou, neste caso, á pena de morte a José Santiago Temprano; pena de cadea perpetua para Pedro Rodríguez Gómez; tres anos de prisión para Teresa Pastoriza Moreira; castigaron a 6 meses e un día a Carmen Vieito Baña. Tamén procesaron, entre outras persoas, a: José Candal Bouzas, Manuel Castro Sanjurjo, Carmen Pan Rioboo e Ramón Ponte Pedreira.

Pasou 12 anos na Prisión Central de Burgos, de onde saíu en liberdade condicional no mes de xaneiro de 1959.