Amaro López, Ofelia

Tiña 13 anos. Filla de Maximino Amaro, do que era orfa desde 1937, e de María-Teresa López Ayán, encarcerada. Veciña de Repil, San Xoán de Chavaga, Monforte de Lemos (Lugo). Irmá de Alfredo Amaro López e Libertad Amaro López, tamén encarcerados. Curmá, polo seu pai, de Álvaro Amaro López e Eugenio Amaro López, igualmente encarcerados.

Encarcerada.

Como os da familia veciña, os López Casanova, na súa casa de Repil acubillaron en varias ocasións, desde setembro de 1947, a varios membros da guerrilla.

Prendérona polos feitos da coñecida como batalla do Piricallo e Repil, en Chavaga, o día 20/04/1949, entre guerrilleiros agochados nestas casas e un numeroso grupo de forzas da Garda Civil.

A redada contou coa colaboración dun infiltrado da Garda Civil na guerrilla, Jesús Costoya López, Senén, que foi quen deu o aviso da presenza de fuxidos na zona de Chavaga.

Xulgado en consello de guerra en Lugo polo delito de “auxilio a malhechores”, na causa 318/49, co resultado de sentenza a tres anos de prisión menor segundo resolución do día 15/08/1949.