Bugallo Valiñas, Severino

Funcionario e político, 44 anos. Casado con Jovita García Dapena. Veciños de Cerdedo e tesoureiro municipal deste concello. Irmán de Sabino Bugallo Valiñas, exiliado.

No ano 1931 militaba no Partido Republicano Radical Socialista (PRRS), sendo concelleiro e tesoureiro. Posteriormente integrouse na Agrupación Socialista (AS), onde exercía de contador da directiva en xaneiro de 1935.

Fuxido. Exiliado. Encarcerado. Sancionado.

Cando se produce o golpe militar participou na requisa de armas para facer fronte aos sublevados.

Detivérono os golpistas con Manuel Garrido, o Negro; José Torres Paz e José Cortizo González; trasladáronos a Pontevedra.

Ingresado na Colonia Penitenciaria da Illa de San Simón, Redondela (Pontevedra).

Severino salvouse de ser paseado grazas á intervención do seu cuñado Vicente García Dapena, Vicente da Carteira, xefe de Falanxe de Soutelo de Montes, Santa María Madanela de Montes, Forcarei (Pontevedra), que o reclamou da comandancia e meteuno nunha fonda.

Despois agachouse na igrexa da Madanela, en Soutelo, en Limeres, pola Chamadoira e polo Monte do Seixo.

En maio de 1938 o gobernador civil de Pontevedra sancionouno cunha multa de 500 pesetas.

Co seu irmán Sabino e desde Vilagarcía de Arousa (Pontevedra), embarcaron e fuxiron a Cuba. Severino pasou despois aos Estados Unidos, de onde volve coas Brigadas Internacionais á zona republicana.

Ao remate da guerra civil escapou para Francia e internárono no campo de concentración de Argelès-sur-Mer (Pireneos Orientais, Occitania, Francia). Foxe deste campo e vai cara Burdeos (Nova Aquitania, Francia) para participar na resistencia contra os nazis alemáns.

Detido polos nazis no ano 1941, deportárono a España e rematou ingresado catro anos no campo de concentración de Villaverde (Madrid), nas cocheiras de Vigo (Pontevedra) e na factoría Astillero Barreras, entre outros lugares de detención.