Freije Freije, Antonio

Labrego, 47 anos. Casado; tiñan cinco fillos. Veciños de Nonide.

Tenente de alcalde de Oscos.

Fuxido. Executado.

Cando se produce o golpe militar tratou, con outras persoas, de impedir a chegada das tropas rebeldes desde Galicia ao Principado de Asturias e acusárono, de xeito presunto, da voadura da ponte de Mazonovo, na estrada de Vegadeo (Principado de Asturias) á Fonsagrada (Lugo).

Despois foxe ao monte e, como non tiña delitos de sangue, presentouse ás novas autoridades o día 10/08/1936.

Ingresado na Prisión Provincial de Lugo o día 20/08/1936.

Xulgado en consello de guerra en Lugo o día 22/08/1936 polo delito de rebelión, na causa 596/36, co resultado de sentenza á pena de morte.

Proceso contra varios asturianos e cos seguintes resultados de condena á pena de morte para: Jaime Fernández Alonso e Antonio Freije Freije; penas de cadea perpetua para: Facundo Alonso Méndez, Antonio Álvarez Trelles e Laureano López Arango.

Morte rexistrada en Lugo ás 06:00 h por fusilamento, preto do cemiterio de Magoi.

Á súa familia sancionárona cunha multa de 10.000 pesetas.