Jaso Paz, Leoncio

Militar, 59 anos. Casado con Eusebia Roldán Salvadores. Veciño de Cádiz, a súa familia permanecía en Madrid. Destinado por un tempo en Marín (Pontevedra), onde naceron os seus fillos. Pai de Enrique Jaso Roldán, depurado, e de Leoncio Jaso Roldán, exiliado.

Participou como tenente de Infantería na Guerra de Marrocos. Durante a II República foi inspector xefe do Corpo de Carabineiros en Madrid. No ano 1936, sendo tenente coronel co Corpo de Carabineiros, trasladárono a Cádiz como xefe da 11ª Comandancia de Carabineiros.

Executado.

Cando se produce o golpe militar púxose ao mando, co capitán Antonio Yáñez-Barnuevo de la Milla (El Saucejo, Sevilla), para defender o Goberno Civil e a Deputación de Cádiz fronte as tropas sublevadas, no cumprimento do seu deber. Aguantaron as posicións os días 18 e 19 de xullo, tendo que abandonar estes edificios cando os rebeldes contaron co apoio de forzas Regulares chegadas de Ceuta.

Xulgado en consello de guerra en Cádiz con outros mandos institucionais, o día 22/07/1936, polo delito de rebelión militar e co resultado de sentenza á pena de morte segundo resolución do día 02/08/1936.

Fusilado no Castelo de San Sebastián, Puerto de Santa María.