Lestón Romero, Melquiades

Mariñeiro e sindicalista, 30 anos. Casado. Veciño de Xixón (Principado de Asturias). Emigrado nos Estados Unidos. Traballou na frota do Gran Sol con base en Xixón.

Afiliado ao Sindicato Protección Obreira de Porto do Son.

Cando residía en Xixón foi un dos fundadores, en 1931, de La Unión Pesquera, vencellada á UXT. Propagandista da Federación Rexional da Industria Pesqueira de Xixón.

Fuxido. Encarcerado. Exiliado.

Fixo a guerra civil na zona republicana, loitou na fronte asturiana. Participou na Confederación Rexional Galaica. Cando caeu a Fronte Norte conseguiu escapar a Valencia.

Ao remate da contenda española os fascistas confinárono no campo de concentración de Albatera (Alacante).

Xulgado en consello de guerra en Valencia polo delito de auxilio á rebelión co resultado de sentenza a cadea perpetua.

Pasou seis anos no penal de San Miguel de los Reyes (Valencia).

Puxérono en liberdade condicional no ano 1946 e volveu a Porto do Son para ver á muller e aos fillos. Acosado polos falanxistas marchou a Pasaia, Francia e Tunes, onde se exiliou e foi asesor de pesca do presidente Habib Bourguiba.

A mediados dos anos cincuenta perdeu a razón e repatriárono.