Mateo Dobao, Domingo

Comerciante e labrego, 46 anos. Veciño de San Lourenzo de Arcos, Vilamartín de Valdeorras. Emigrado en Cuba, país do que regresou no ano 1931.

Militante da UXT e do PCE. Presidente do Sindicato de Oficios Varios de Valdeorras. Candidato pola provincia de Ourense nas eleccións de 1933 pola Fronte Única.

Fuxido. Exiliado.

Xulgado en consello de guerra en Ourense polo delito de rebelión militar co resultado de ser declarado fuxido e en rebeldía.

Cando se produce o golpe militar formou parte das Milicias Galegas e tentou saír con outros 200 valdeorreses cara a zona republicana. Dadas as dificultades, que se debían aos controis franquistas, tiveron que dividirse en tres grupos; Domingo mandaba un deles, ferírono nunha man.

No momento da fuga e diante da imposibilidade de acadar o Principado de Asturias, permaneceron nos montes de León formando unha partida guerrilleira que chegou a acadar as 37 persoas baixo o seu mando.

Finalmente chegaron á fronte asturiana. Tamén combateu na fronte de Aragón.

Ao rematar a guerra civil pasou a Francia, país no que solicita emigrar a México.

Ábreselle o expediente nº 223/41 de responsabilidades políticas en Ourense.