Noguerol Buján, Arturo-José

Avogado, xornalista, poeta e escritor, 44 anos. O día 21/01/1924 casou con Eloísa Martínez Carballo; tiñan unha filla e un fillo nados en Ourense: Eloísa e Pedro-Arturo. Veciños de San Salvador de Serantes. Licenciado en Dereito pola Universidade de Salamanca en 1915. Secretario do Concello de Serantes desde 1932; antes xa o fora no Pereiro de Aguiar (Ourense), Avión (Ourense) e Rianxo (A Coruña). Amigo de Vicente Martínez-Risco Agüero.

Participou na publicación La Centuria, que foi a fonte do galeguismo en Ourense.

Membro das Irmandades da Fala desde o ano 1917. Participou na fundación de Irmandade Nacionalista Galega (ING), da que exerceu de delegado en Ourense. A súa actividade política cesou durante case seis anos, ata o 1936.

Co-fundador, colaborador e ex-xerente da revista Nós. Tamén escribiu en A Nosa Terra, La Billarda ou La Zarpa.

Paseado.

Prendérono na Coruña o día 10/08/1936 por "propagar noticias tendenciosas", internárono no Castelo de San Antón, na cidade herculina, e trasladárono á prisión da Escollera, no Arsenal ferrolán.

Xulgado no Tribunal Militar Territorial de Ferrol (A Coruña) por inxurias ao Exército, na causa 478/36, co resultado de sentenza de sobresemento.

Sacárono da cadea os paramilitares, o día 11/09/1936, con outras 12 persoas nun ómnibus; na noite seguinte asasináronos no cemiterio de Serantes.

O seu cadáver apareceu nunha cuneta da estrada A Coruña-Ferrol.

Morte rexistrada en Ferrol a mans da forza pública franquista preto do cemiterio de Canido.

Soterrárono con outras doce persoas nunha fosa común no cemiterio de Serantes.