Rodríguez Blanco, Marcelino

Carabineiro, 50 anos. Veciño de Tui. Capitán do Corpo de Carabineiros desde marzo de 1935 e destinado na comandancia de Tui en 1936.

Executado.

Cando se produce o golpe de Estado tiña o seu destino en Tui, na 17ª Comandancia do Corpo de Carabineiros, na guarnición de Tui.

Coas forzas ás súas ordes, tropas de mariñeiría, Garda Civil e moitos paisanos, fixo fronte á sublevación militar contra da República, ata o día 27 de xullo en que tiveron que renderse diante da superioridade das forzas rebeldes.

Negouse a fuxir a Portugal e capturárono as tropas franquistas. Fíxose responsable dos feitos que ocorreran na resistencia en Tui, pero aínda así os rebeldes asasinaron a moitos dos seus compañeiros de trincheiras.

Xulgado en consello de guerra o día 09/09/1936 no Cuartel de Infantería de Tui polo delito de rebelión militar, na causa 517/36, co resultado de sentenza á pena de morte.

Fusilado na Alameda de Tui en cumprimento de sentenza con Laureano Doniz Martínez, ao que condenaran tamén á pena de morte no mesmo procedemento.