Allo Sabor, Perfecto

Mariñeiro e sindicalista, 29 anos. Casou en 1931 con Rita Rodríguez Baúlde. Veciños de Meloxo de Arriba, San Martín do Grove, O Grove. Irmán de Juan Allo Sabor, fusilado en Pamplona.

Afiliado ao Sindicato Mariñeiro La Fraternidad do Grove, vencellado á CNT.

Fuxido. Paseado.

Os franquistas acusábano de ser un dos xefes das patrullas armadas que percorreran a vila do Grove en xullo de 1936, de organizar folgas, de dinamiteiro e de ser un elemento moi perigoso.

Despois do golpe militar agochouse no monte e, logo, nun refuxio que lle fixeron na súa casa; polo día cosía zapatillas e remendaba calzado e roupa para axudar na economía da casa.

Detido na madrugada do día 12/04/1938 cando un grupo de garda civís practicaban un rexistro domiciliario; os gardas recibiran confidencias de que varios fuxidos baixaban ás súas casas para pasar a noite.

Ingresado na Colonia Penitenciaria da Illa de San Simón, Redondela (Pontevedra).

Os fascistas aplicáronlle a Lei de Fugas en Vilagarcía de Arousa, cando o trasladaban para que identificase os lugares onde se agochaban outros fuxidos.

O seu cadáver apareceu no Monte Lobeira, San Pedro de Cornazo, Vilagarcía de Arousa, onde o soterraron co vigués Manuel Álvarez Silva.

Soterráronos nunha fosa común no cemiterio de San Pedro de Cornazo.

Morte rexistrada en Vilagarcía de Arousa por mor de fractura da bóveda cranial e perda de masa encefálica producida por unha bala.

Semella que o asasinaron a golpes.