Álvarez Lorenzo, Nemesio

Carpinteiro, político e sindicalista, 36 anos. Casado con Nicolasa Portela Álvarez, Nicolasa das Faras, natural de Camposancos; tiveron dous fillos. Veciños da rúa Muro, 17, na Guarda. Vixiante de arbitrios desde marzo de 1936.

Nemesio pertenceu a Agrupación Republicana (AR) da Guarda e foi directivo en 1932 da Federación Local Obreira (FLO) da mesma localidade, vencellada á CNT. Logo ingresou no Partido Galeguista (PG).

Detido na folga xeral do ano 1933 e encarcerado na folga xeral revolucionaria de outubro de 1934, acusado de atentar contra varias empresas e a igrexa parroquial.

Fuxido. Paseado.

Despois de que se producira o golpe dos militares rebeldes participou na requisa de armas e formou parte das milicias armadas contra dos golpistas na Guarda. Desde o 27 de xullo agochouse no cabanón da súa casa materna, en Camposancos.

Xulgado en consello de guerra en Pontevedra polo delito de rebelión militar co resultado de ser declarado fuxido e en rebeldía.

Un veciño da casa dos seus pais, Marcelino Portela, o Murgas, delatouno e a Nemesio prendérono os falanxistas no seu agocho da casa familiar, paseárono e cribárono a balazos.

O Murgas non tardou en morrer de cancro.

A súa muller Nicolasa e o seu fillo Serafín emigraron a Brasil.