Baliño Sánchez, José-María

Practicante e militar, 40 anos. Casado; tiveron dous fillos. Veciños de San Xurxo de Cereixo, A Estrada (Pontevedra). Practicante en buques mercantes.

Exiliado. Encarcerado.

Sorprendeuno o golpe dos sublevados embarcado en Barcelona e intégrase como voluntario no Exército Popular republicano onde exerceu de practicante militar provisional do Corpo de Sanidade Militar.

Ao rematar a guerra civil pasa a Francia o día 07/02/1939; ingresárono en diferentes campos de refuxiados e algún campo de traballo: Argelès-sur-Mer (Pireneos Orientais, Occitania, Francia), con ata 100.000 persoas á intemperie, Le Barcarès (Pireneos Orientais, Occitania, Francia), Saint-Cyprien (Pireneos Orientais, Occitania, Francia) e retorno a Argelès-sur-Mer.

En decembro de 1939 saíu nunha compañía de traballadores cara Normandía para construír unha vía de ferrocarril, que daría servizo a unha fábrica de avións.

Traballou en distintas profesións e en 1944 incorporouse á resistencia francesa contra dos nazis. Participou na Invasión do Val de Arán, que se desenvolvera do 19 ao 27 de outubro de 1944 e que sería un fracaso.

Enfermo de úlcera, despois dos feitos do Val de Arán, entregouse á Garda Civil en Castejón de Valdejasa (Zaragoza) e o 13/11/1944 intérnano na Prisión Provincial de Zaragoza.

Xulgárono en consello de guerra en Zaragoza polo delito de rebelión militar o día 19/05/1945, na causa 229/44, co resultado de sentenza a 12 anos de prisión.

Pasou polos penais de Zaragoza, San Miguel de los Reyes, Modelo, Cáceres, Yeserías e Talavera de la Reina.

Sae en liberdade en 1949 e volta para Cereixo.