Bao Maceiras, Elvira

Mestra, 46 anos. Casou en 1923 con Bernardino Varela Docampo, mariño mercante e profesor; tiveron unha filla: Elvira. Veciños da Avenida de Rubine, na Coruña. Consegue o título de mestra na Escola Normal da Coruña en 1906; tiña 16 anos. Mestra en Redes, San Vicente de Caamouco, Ares (A Coruña) e no Sanatorio Marítimo de Oza, nas Colonias Escolares de 1920 a 1936; en 1936 nomeárona directora.

Militou nas Irmandades da Fala, das que exerceu como secretaria da xunta directiva en 1918.

Militante do Partido Galeguista (PG) e afiliada á Agrupación Republicana Feminina, da que en 1933 era presidenta da súa xunta directiva.

Encarcerada. Depurada.

Denunciárona por desafección ao novo Réxime.

Arrestárona na súa casa a primeiros de agosto de 1936 e pasou tres meses na Prisión Provincial da Coruña e cando saíu da cadea molestábana a diario os falanxistas. Consideraban que tivera amizades perigosas. Librou das sacas asasinas.

Separada definitivamente da ensinanza pública o día 13/08/1936 e xa non puido recuperar o seu posto de mestra.

Deixou a súa casa e viviu coa súa familia en San Roque de Afora, na Coruña. Montou unha escola privada, en 1945, onde traballou ata que quedou sen vista por un desprendemento de retina.