Casado Atanes, Anunciación

Labrega e política, 39 anos. Casou en 1920 con Eduardo García (morto de accidente na II República); tiveron catro fillos. Veciños de Santiago de San Mamede, Viana do Bolo. Estiveron emigrados en Sestao (Biscaia) e ao morrer o seu home, nun accidente laboral, volveron á aldea de Eduardo. En Bilbao coñeceu a Dolores Ibarruri Gómez, madriña do seu último fillo. Traballou as terras da familia e como xornaleira.

Era unha gran oradora e defensora do campesiñado. Responsable territorial do PCE na comarca de Viana do Bolo e defensora das persoas máis modestas.

Paseada. Sancionada.

Despois do golpe dos sublevados foi obxecto dunha constante persecución e andou fuxida un mes.

Detida polos falanxistas de Verín (Ourense) o día 20/08/1936, sería ultraxada, pelada, violada, exhibida nun carro de bois pola Gudiña e asasinada.

Morte rexistrada no lugar das Reverdeitas, Viana do Bolo, na estrada da Gudiña-Viana do Bolo, a causa de fractura e destrución masiva da masa cerebral.

Soterrárona os veciños que atoparon o seu cadáver nunha fosa común no Castro, Pexeiros.

Con posterioridade embargáronlle os seus bens e os seus fillos pequenos tiveron que ver como os fascistas lles queimaban as súas pertenzas. Os fillos maiores: Flora e Eduardo pasaron pola cadea.