Figueroa Lires, Manuel

Mariñeiro e cociñeiro, 35 anos. Casado con Emerenciana Patiño Hermida, La Gallega; tiveron catro fillos. Veciños da Coruña. Traballou como cociñeiro en barcos grandes.

Militante da CNT.

Fuxido. Exiliado. Encarcerado.

Cando estoura a guerra civil estaba en Belfast (Irlanda do Norte) no barco no que traballaba. Volveu á Coruña e integrouse na CNT clandestina.

Manuel e Emerenciana fuxiron a Francia nun barco de pesca con outras 21 persoas e chegaron a Brest. Logo pasaron os dous a Barcelona e loitaron no exército republicano durante a guerra civil.

Ao remate da contenda escaparon a Francia polos Pireneos e estiveron en varios campos de concentración; a Manuel condenárono a traballos forzados e traballou na Liña Maginot nunha compañía de traballadores estranxeiros; logo incorporouse á resistencia francesa.

Prendérono os nazis no desenvolvemento da II Guerra Mundial en Estrasburgo stalag V-D (Gran Este, Francia). Deportárono ao campo de exterminio de Mauthausen (Austria) o día 13/12/1940. Trasladado ao sub-campo de Gusen (Austria) o 24/01/1941.

Liberado pola XI División Blindada de EEUU o 05/05/1945; estableceuse con Emerenciana en La Grand-Combe, onde traballa como mineiro.