García Moldes, Francisco

Mestre, xornalista e político, 25 anos. Casado en novembro de 1937 en Pontevedra con Dolores Vilela Pereira; tiñan tres fillas. Rematou a carreira de Maxisterio na Escola Normal de Pontevedra no ano 1934. Mestre en Crecente, Cambados e O Grove.

Militante do Partido Galeguista (PG) do Grove no ano 1934, do que foi bibliotecario en febreiro de 1935. Afiliado da Federación de Traballadores da Ensinanza da UXT (FETE-UXT) e membro do Sindicato de Oficios Varios grovense La Fraternidad.

Correspondente de El Pueblo Gallego e colaborador de El País.

Executado.

Despois do golpe militar estivo agochado un tempo e nomeárono en setembro mestre interino en San Caetano de Quintela, Crecente (Pontevedra); integrouse no exército golpista como xurista militar para fuxir da represión, defendendo aos republicanos procesados en consellos de guerra e presos no Forte de San Cristóbal, Pamplona (Navarra).

Unha vez que se licenciou, no ano 1942 era mestre en Cambados (Pontevedra).

Asasinárono a unha da madrugada do 7 de maio nun café da rúa Principal do Grove o comandante do posto da Garda Civil e un falanxista de varios tiros, un deles na cabeza; morte xustificada como “un desafortunado accidente”.

Semella que o asasinaron polas súas actividades antifranquistas. Por mor do seu asasinato abriuse no Tribunal Militar Territorial de Pontevedra a causa 229/48.