Lago Campos, Eusebio

Alcalde pedáneo de Cabral.

Falanxista de Cabral e confidente da Garda Civil.

Represor. Axustizado.

Membro dun grupo de paramilitares, que aterrorizaban a zona, e alcalde pedáneo. Perxuro do comunismo e falanxista para matar e enriquecerse; tamén era comerciante e un dos principais responsables da represión na súa parroquia. Lugartenente e brazo executor do maior represor de toda a zona, Fernando Mariño, o dos Caducos.

Represor franquista dos seus veciños, con José Novas Currás, o Meira. Coincidiu nestas labores represoras co Cordobés, o Chino, o Mingos, os Velosos, o Cuco, Manolito da Mirlota, os Carbineiros ou os Baos.

Por estas facetas serían varios os grupos armados antifascistas que atentaron contra a súa vida.

O día 30/01/1947 membros do Destacamento Paco Barreiro executárono nunha popular taberna do Carballal, coñecida como a do Marqués. Eusebio entrou acompañado por dous veciños, Ángel Bastos González, Pisas, e Juan Fernández Balado, Silviño, que logo o deixaron só. Ao local accederon dúas persoas armadas con pistolas e dispararon sobre Eusebio Lago Campos. Por mor desta execución houbo detencións masivas de familiares e persoas vencelladas á loita antifranquista.

Os executores de Eusebio foron: Avelino Otero Montes, Avelino, e Manuel Simón Campos, Xanote, do Destacamento Paco Barreiro, da V Agrupación do Exército Guerrilleiro de Galicia (EGG).

Os fascistas convertérono nunha referencia do martiroloxio en Vigo e os guerrilleiros acusárono de asasino, de denunciar antifranquistas e de roubar as colleitas aos labregos.

Polo seu axustizamento abriuse no Tribunal Militar Territorial de Vigo a causa 75/47.