Margolles Déspora, Manuel

Mestre, 60 anos. Casado con Belarmina de la Vega Gutiérrez. Veciños de Ribadeo (Lugo). Pai de César Margolles de la Vega, fuxido e paseado, e de Isabel Margolles de la Vega e Mercedes Margolles de la Vega, ás que tamén encarceraron.

Concelleiro de Ribadeo no ano 1931 polo Partido Republicano Radical (PRR) e síndico polo PSOE en 1936, formando parte da coalición da Fronte Popular (FP).

Manuel pertenceu á masonería.

Fuxido. Encarcerado.

Foxe de Ribadeo despois do alzamento sedicioso.

Xulgado en consello de guerra en Lugo polo delito de rebelión militar, na causa 335/36, co resultado de ser declarado fuxido e en rebeldía segundo resolución do 11/07/1939. Proceso contra varios veciños de Ribadeo.

No dito auto impúxoselle a pena de morte a José-María Rodríguez Corbeiras; prisión para Salvador González Álvarez e sobresemento provisorio para: Manuel Rodríguez Monteavaro e Modesto Ramos Martínez. Declaráronse fuxidos a: Viriato Campoamor García, Máximo López Castaño, Manuel Margolles Déspora, Blanca Quiroga Martínez e Elías Soliño Medina.

Xulgado en consello de guerra en Xixón (Principado de Asturias) polo delito de rebelión co resultado de sentenza á pena de morte.

Pena de morte conmutada pola de cadea perpetua.

Como represalia á súa familia deportárona a Ávila.

Interno na Prisión Central de Xixón, publicaron a súa liberdade condicional provisoria no BOE nº 286 do día 13/10/1943.

Procesárono por responsabilidades políticas en Lugo e indultárono no ano 1943.