Piñeiro Díaz, Enrique

Militar, 23 anos. Veciño de Ferrol (A Coruña). Mariño da Armada, destinado no acoirazado Jaime I.

Militante da CNT.

Encarcerado.

Cando se produce a sublevación militar foi un dos mariñeiros que se fixeron co seu acoirazado e o puxeron ao servizo do goberno legal. Logo levaron o barco de guerra a Tánxer.

Fixo a guerra civil no exército republicano. Era cabo de artillería no acoirazado Jaime I en abril de 1937. Despois da sabotaxe ao Jaime I pasou ao Cabo San Agustín, que movía materiais entre os portos republicanos e Rusia e aportado en Odessa, a finais de 1938, retivérono as autoridades rusas.

Ao rematar a contenda española seguía en Rusia, prendérono, recluírono na república de Yakutia e, en novembro de 1942, no campo 99 de traballos forzados (gulag) en Karagandá (Kazajistán).

O día 02/04/1954 chegaba ao porto de Barcelona o barco Semíramis con retornados españois; o barco saíra do porto de Odessa (Ucraína). Regresaban un total de 286 españois: 229 veteranos da División Azul, 19 desertores do Exército Rojo, 15 alumnos pilotos republicanos, 19 mariñeiros republicanos e catro nenos da guerra.

Dos 19 mariñeiros republicanos repatriados, polo menos sete eran galegos: Juan Castro López, Manuel Dávila Eiras, José García Gómez, Juan-Manuel Gómez Mariño, Antonio Leira Carpente, Enrique Piñeiro Díaz e Ramón Santamaría García.