Pontevedra González, Peregrino

Mariñeiro, 34 anos. Casado; tiñan catro fillos. Veciños de Cambados.

Militante da CNT e membro do Sindicato da Industria Pesqueira (SIP). No ano 1936 era concelleiro de Cambados pola coalición da Fronte Popular (FP) e pertencía a Esquerda Republicana (ER).

Encarcerado. Morte na cadea.

O día 20/07/1936 fórmase un Comité de Defensa da República que preside o alcalde José-Manuel Silva Losada e no que figuran Manuel Bugallo Martínez, Antonio Chaves del Río, Juan-José Varela Oubiña e Peregrino Pontevedra González. O Sindicato de Oficios Varios declara a folga xeral revolucionaria con requisas de armas e asaltos a domicilios; na noite deciden asaltar o cuartel da Garda Civil e morre a dona do cabo comandante do posto. O día 21 de xullo chegan forzas golpistas da Garda Civil e sufocan a resistencia.

Xulgado en consello de guerra en Pontevedra polo delito de rebelión militar, o día 10/12/1936, co resultado de sentenza a cadea perpetua.

Neste consello de guerra xulgaron a: Manuel Bugallo Martínez, mariñeiro; Antonio Chaves del Río, mariñeiro; Manuel Martínez Piñeiro; Peregrino Pontevedra González, mariñeiro; José-Manuel Silva Losada, empresario, e Juan-José Varela Oubiña, mariñeiro.

Ingresado na Colonia Penitenciaria da Illa de San Simón, Redondela (Pontevedra).

Trasladado ao penal de San Cristóbal, onde ingresa o 16/05/1937; cadea na que se rexistra a súa morte no desenvolvemento do intento de fuga masiva deste penal; non participa no intento de fuxida, aínda que o alcanzou un tiro que rematou mortal.