Rodríguez Celeiro, Salustiano

Cura e poeta, 48 anos. Cura párroco de San Salvador de Serantes, Ferrol (A Coruña) desde 1934. Ordenouse no ano 1917 e pasou por varias parroquias de Ferrolterra.

Contrario aos idearios republicanos, ten enfrontamentos co alcalde Alejandro Porto Leis; o cura remata detido no ano 1933 por incumprir as ordenanzas municipais sobre o toque das campás, o xuíz ordena a súa liberación. Salustiano denuncia a Porto Leis por abuso de poder e o alcalde remata arrestado en xaneiro de 1934.

Represor.

Os curas do rural ferrolán non tiñan unha posición tan unánime contra dos represaliados coma os da cidade de Ferrol. Destacaron como protectores dos represaliados o cura de Valón, San Román de Doniños, Ferrol, Juan Blanco Abuíde; o de San Xoán de Esmelle, Ferrol; Jesús López López; o de San Martiño de Cobas, Emilio Gayoso Vázquez e o de Santa Uxía de Mandiá, Ferrol José-María Balseiro.

Os máis represores serían: Ramón Mayobre Pego, de Santa María de Brión, Ferrol, e Salustiano Rodríguez Celeiro, de San Salvador de Serantes, Ferrol.

Foi moi belixerante nos seus sermóns contra os folguistas que participaron na folga xeral revolucionaria de outubro de 1934 e mostrouse moi activo na represión posterior.