Rodríguez González, Pastoriza

Casou o día 11/04/1923, en Bendilló, co mestre Agustín Couto Mallén. Veciños de San Xián de Marín, Marín (Pontevedra).

O seu home exerceu de mestre en Bendilló de 1923 a 1933, onde casou con Pastoriza. No ano 1933 volve como mestre de San Xiao de Marín.

Semella que Agustín se unira á Unión Republicana (UR) xa que a súa familia directa e política tiña responsabilidades dentro deste partido.

Vítima colateral.

Despois do golpe de Estado ao seu home ameazárono os falanxistas, polo que se refuxiou en Vigo (Pontevedra), na casa da súa irma Mariña e a familia fixo correr a voz de marchara para a República Arxentina. Pastoriza e os seus fillos regresaron a Bendilló.

A Couto Mallén ábreselle un expediente de depuración con resolución do día 30/08/1936 de suspensión de emprego e soldo, separación definitiva do servizo e baixa na escala de mestres.

Para sobrevivir e axudar á súa familia Agustín adicouse a facer pinzas e agullas, traballou nas minas de volframio de Santa María de Casaio, Carballeda de Valdeorras (Ourense) dous anos, empregouse de carpinteiro na construción de presas e encoros e tivo un obradoiro de carpintería na súa casa de Bendilló.

A Agustín suspendérono de emprego e soldo durante 22 anos, de 1936 a 1958, ano no que acaba rehabilitado, pero coa sanción de tres anos fóra da provincia e inhabilitación para cargos directivos e de confianza.