Teijeiro Suárez, Laurentino

Empregado municipal. Veciño da Coruña. Operario da limpeza pública no Concello da Coruña.

Depurado.

Na relación do ano 1947 cítase que «Por haber tomado parte contra el Movimiento, destituido sin expediente».

Era axudante de rego na cuadrilla de limpeza e non se presentou, o día 21/07/1936, ao seu posto de traballo. Como dita falta considerábase desacato penado coa destitución, segundo as prevencións dos bandos de guerra, o alcalde Fuciños abriulle un expediente sumarísimo aclaratorio o 25/07/1936. Nese mesmo día incorporouse ao traballo xustificando a súa ausencia en que estaba de visita familiar na aldea de Cela, en Cambre e que non puido regresar por temor a unha agresión.

A escusa aceptouse nun principio, pero días despois, o 01/09/1936 prendérono no traballo e o seguinte día 3 ingresárono na Prisión Provincial, segundo un oficio do Goberno Civil porque «de un atestado que se ha instruido por la Guardia Civil de esta capital se desprende ha tomando parte en el movimiento contras las Fuerzas del Ejército».

Destituído polo alcalde Fuciños o día 10/09/1936 porque «no es merecedor de confianza de la Autoridad por sus antecedentes y sus sospechosas actividades».