Torres Ferro, Nicolás

Escribinte, 39 anos. Veciño da rúa Porta de Aires, 19-1º, na Coruña.

Encarcerado.

A primeiras horas do día 17 de xullo de 1936 chegaban ao Goberno Civil as primeiras novas da sublevación. Francisco Pérez Carballo, gobernador, recibía instrucións do Goberno para convocar aos líderes políticos e sindicais para facer unha fronte común para a defensa da legalidade política, referendada nas urnas en febreiro, e organizou o Comité de Defensa da República, igual ao que se formara en todas as cidades e pobos de España.

O comité da Coruña formábao o propio gobernador e: Ramón Maseda Reinante, presidente da Agrupación Local do PSOE; José García García, Pepín da Lixivia, polas XSU; José Moreno Torres, secretario xeral da Confederación Rexional Galaica (CRG); Francisco Mazariegos Martínez, da UXT; Alfredo Suárez Ferrín, alcalde da cidade e representante de UR; Eladio Muíños Díaz, da CNT; Jacinto Méndez Esporín, da FAI; Manuel Fernández Fernández, do Partido Sindicalista; Nicolás Torres Ferro, do PCE; Plácido-Ramón Castro del Río, polo PG; Joaquín-Manuel Guzmán García, por ER, e Luis Vidal Ojén, polas Xuventudes de ER.

Despois do triunfo da sublevación militar figuraba como fichado pola policía represora e considerado comunista.

Detido polos fascistas e ingresado na prisión do Castelo de San Antón, na Coruña.

Nun informe policial aparece manuscrito a lapis unha D (detido).