Vaamonde Valiño, José

Labrego, 43 anos. Casado con Carmen Romay Cortés, tamén encarcerada; tiñan tres fillos. Veciños da rúa Caraña de Abaixo, 23, en Betanzos.

Militante da CNT.

En abril de 1936 a José retivérono, do día 18 ao 21, na cadea de Betanzos por tenencia de armas.

Fuxido. Encarcerado. Morte na cadea.

Andou fuxido mentres durou a guerra civil. Ocultouse polos montes dos arredores durante case toda a contenda e a familia facíalle chegar alimentos a través do seu fillo maior Manolo, duns dez anos. Para premelo prenderon a súa dona Carmen e el rematou por presentarse diante dos franquistas coa promesa de que a muller quedaría en liberdade

Xulgado en consello de guerra na Coruña o día 21/11/1939 polo delito de rebelión, na causa 1048/39, co resultado de sentenza a 20 anos de prisión.

Morte rexistrada na Prisión Provincial da Coruña.

Soterrárono o día 16 de xaneiro nun nicho no cemiterio de San Amaro, na Coruña.

Á súa dona non a liberaron e sufriu cadea en El Dueso, Santoña (Cantabria), mentres aos fillos os atendían os familiares.

No folleto Betanzos honra a sus mártires dise que José faleceu polas penalidades que pasou mentres andou á fuga e pola fame e a miseria que pasou na cadea.