Virgós Guillén, Leoncio

Profesor universitario, farmacéutico, médico e político, 54 anos. Casou en 1902 con Amelia Pintos Reyno; tiveron doce fillos, entre eles: Fernando-Esteban-Eusebio Virgós Pintos, procesado, e Tirso Virgós Pintos, colaboracionista. Veciños de Santiago de Compostela (A Coruña) desde mozo. Licenciado en Farmacia e en Medicina pola Universidade de Santiago de Compostela (USC). Tamén estudou Maxisterio. Profesor auxiliar de Química Orgánica e agregado da cátedra de Química Inorgánica desde 1919 na Facultade de Farmacia da USC. Tivo tres farmacias en Santiago de Compostela.

Na parte traseira da súa botica reuníanse a miúdo os socialistas santiagueses.

Militante da Agrupación Socialista (AS) compostelá e presidente en xullo de 1931 da Federación de Entidades Socialistas Obreiras, Labregas e Mariñeiras da comarca de Santiago de Compostela.

Depurado. Exiliado. Sancionado.

Castigado coa separación definitiva do servizo despois do alzamento militar rebelde. Acusárono de pro-soviético, antimilitarista, socialista e esquerdista.

Despois de producirse o golpe militar agochouse ata que puido saír, en setembro de 1936, desde o porto de Vigo (Pontevedra) para a República Arxentina, país no que exerceu a medicina en Los Menucos, Patagonia; logo instalouse en Bos Aires.

Morte rexistrada en Bos Aires por mor dunha pneumonía.

Sofre a represión económica, despois de morto, por parte do Tribunal de Responsabilidades Políticas.