Carballo Novigil, Florencio

Mariñeiro, 47 anos. Casado. Veciño de Ribadeo (Lugo). Antes fora albanel.

Militante do PSOE de Ribadeo.

Encarcerado. Paseado.

Xulgado en consello de guerra en Lugo o día 02/08/1936 polo delito de rebelión militar, na causa 309/36, co resultado de ser declarado fuxido e en rebeldía. Proceso contra varios veciños de Ribadeo.

A sentenza deste xuízo condenou á pena de morte a: Fernando Bellón Fernández, Antonio Fernández Sánchez e Luciano Martínez Piñeiro; penas de cadea perpetua para: José Castaño Reimundo, Francisco Rodríguez Monteavaro e Luciano Rodríguez Monteavaro; tamén castigaron a prisión a José-Antonio Díaz Álvarez. O auto declarou fuxidos a: Florencio Carballo Novigil, Santiago Fariña Reinante, Enrique Navarret García, José-María Torviso Fernández e Andrés Vale Blanco.

Andado o tempo capturárono os sediciosos e encarcerárono en Ribadeo.

Os falanxistas sacárono da cadea de Ribadeo o día 11/09/1936 para pasealo ao día seguinte.

Morte rexistrada no Prado dos Remedios por mor de ferida de arma de fogo no bulbo-raquídeo.

Nun primeiro momento rexistrárono como descoñecido.

Asasinouno o brigada da Garda Civil e xefe comarcal de milicias de Falanxe Española Tradicionalista e das Xuntas de Ofensiva Nacional Sindicalista (FET-XONS) Pablo de la Fuente Aguirre, quen xustificou a execución cun intento de fuga.

Nese lugar e data asasinaron a: Florencio Carballo Novigil, mariñeiro; Antonio-María Martínez López, labrego; Enrique Navarret García, mariñeiro, e Andrés Vale Blanco, xornaleiro.

Soterráronos nunha fosa común no cemiterio municipal de Mondoñedo, o Cemiterio Vello.