Díaz González, Manuel

Médico, 50 anos. Casado con Regina Carnero Pardo (+1923) e logo casou en 1927 coa súa cuñada María-Luz Carnero Pardo. Veciños do Incio. Licenciouse en Medicina na Universidade de Santiago de Compostela (USC); rematou en 1913. Exerceu de médico en Valdesandinas (León) e, en 1920, no Incio, onde o recoñecían pola súa atención aos pobres. Foi inspector de Sanidade.

Alcalde do Incio en 1924. En 1932 o Partido Republicano Galego (PRG) triunfa nas eleccións en Sarria (Lugo). O día 29/12/1935 noméano presidente de Esquerda Republicana (ER) no Incio.

Encarcerado. Paseado.

Despois do movemento sedicioso tentaron convencelo de que fuxira; arrestárono os fascistas en agosto.

Ingresado no cárcere de Monforte de Lemos (Lugo) o día 02/08/1936.

O día 07/09/1936 sacárono desta cadea os falanxistas e paseárono. Semella que neste asasinato estiveron implicados os membros da Escuadra Negra de Eirexalba Manuel Díaz López, Chaquetón, e Manuel Castro Castro, Eirexalba, e algún fillo do médico interino de Atención Pública Domiciliaria (APD) do Incio Manuel López Vizcaíno, logo médico titular desde agosto de 1936.

Morte rexistrada no quilómetro 1 da estrada Bóveda-O Incio, no punto coñecido como Casilla da Serra, en Eirexalba, por mor de morte violenta.

Soterrárono nunha fosa común no cemiterio vello do Incio.

A súa dona marchou en 1951 para Bos Aires (República Arxentina), onde morre en 1982.