Feliz Álvarez, Antonio

Garda civil. Sarxento da Benemérita destacado na Brigadilla de Servizos Especiais de Ponferrada (León).

Represor.

Participou en numerosas accións de represión contra veciños e homes do monte na zona do Bierzo e da Cabrera, en León. Chegou a asasinar a varias persoas, en ocasións facéndose pasar por guerrilleiro.

Entre outros macabros servizos, sinálanse os seguintes:

A principios do verán de 1947, o día 28/06/1947, participou nas rúas de Ponferrada no asasinato do mestre Antonio Gutiérrez San Miguel, quen antes de morrer acusouno de atacalo; as dilixencias iniciadas polo delito pecháronse sen molestar ao asasino.

O día 06/09/1947, con David Fernández Carreño, Paturro, e outro compañeiro que non participou en tamaña barbaridade, prenderon, violaron e asasinaron á moza Primitiva Rodríguez, veciña de Ferradillo, Priaranza del Bierzo (León). Ferradillo era un lugar onde os homes do monte tiñan moitos enlaces. Había rumores de que Primitiva tivera relacións sentimentais con Manuel Girón Bazán, Girón.

O mesmo día do asasinato de Primitiva, secuestraron e asasinaron ao veciño desta Pablo Rodríguez Asenjo, enlace da guerrilla; o seu cadáver apareceu o día 27/09/1947.

Membros da súa brigadilla mataron o día 24/07/1947 ao médico de Peranzanes (León) Lodario Gavela Yáñez, quen combatera no exército republicano na Fronte Norte e que tiña estreita relación coas persoas fuxidas, aos que tiña atendido en ocasións.

Aínda que a Garda Civil quixo imputar as mortes aos guerrilleiros, os veciños testificaron que iso era unha mentira. Nos procesos non se tomaron outras medidas e arquiváronse os casos.