Fernández Vega, José-Antonio

Médico e político, 45 anos. Casado; tiñan seis fillos. Desenvolveuse como médico no Hospital Provincial de Oviedo (Principado de Asturias) e despois montou unha clínica en Ponteareas (Pontevedra), onde obtivo recoñecemento por atender ás persoas sen recursos e sen cobrarlles.

Presidente da Casa do Pobo de Ponteareas e de Esquerda Republicana (ER).

Nomeárono gobernador civil de Lugo despois das eleccións de febreiro de 1936 ata xuño dese ano, cando o destinaron como gobernador civil a Málaga (do 03/06/1936 ao 10/10/1936).

Exiliado. Encarcerado. Executado.

Cando se produce o golpe de Estado tivo que facer fronte en Málaga ao levantamento militar. No mes de outubro de 1936 cesouno como gobernador civil o ministro de Gobernación Valentín Galarza Morante por mor duns rumores que o acusaban de apropiación de fondos.

Regresou ao Principado de Asturias coa súa familia e dirixiu o Hospital de Llanes durante un mes, ata que o destituíron pola desconfianza sobre a súa persoa dos dirixentes da Fronte Popular (FP).

Coa caída da Fronte Norte en 1937 pasou a Francia e, ao carecer de medios, volveu a España como médico da Subsecretaría de Armamento de Barcelona ata a caída de Cataluña.

Despois da caída da fronte catalá exiliase en Francia.

Ingresárono nun campo de concentración francés, prendeuno a Gestapo (policía secreta nazi) o día 10/06/1940 e enviárono a España con outros detidos, entre eles Lluis Companys Jover (Torrós, Tornabou, Lleida). Trasladado á Dirección Xeral de Seguridade en Madrid e, logo, á Prisión Provincial de Sevilla e á de Málaga, na que o internan o día 20/10/1940.

Xulgado en consello de guerra en Málaga o día 20/03/1942 polo delito de rebelión militar, na causa 314/41, acusado de permitir como gobernador civil a saca de 275 persoas as que executaran. Fernández Vega declarou descoñecer estas execucións e manifestou no xuízo que salvara a vida de moitas persoas. Condenárono á pena de morte.

Fusilado no cemiterio de San Rafael, en Málaga; alí o soterraron nunha fosa común.