García Núñez, Ramón

Funcionario e político, 30 anos. Casado. Estudou na Escola de Comercio e gañou unha praza de funcionario nas oposicións ao Banco de España en Vigo (Pontevedra).

Militante do Partido Republicano Radical Socialista (PRRS) e despois de Esquerda Republicana (ER), sendo secretario xeral en Vigo de ER desde 1934. En 1936 fixo campaña a favor da Fronte Popular (FP). O día 05/07/1936 nomeárono gobernador civil de Lugo.

Executado. Sancionado.

Cando se produce o golpe militar do 18 de xullo atopábase en Vigo. Descartou fuxir e regresou ao seu posto en Lugo, onde o arrestaron inmediatamente e ingresárono no cárcere da cidade o día 24 de xullo con moitas outras persoas das esquerdas.

Xulgado en consello de guerra sumarísimo en Lugo os días 13 e 14/10/1936 polo delito de traizón, na causa 330/36, co resultado de sentenza á pena de morte e multa mancomunada de 1.500.000 pesetas segundo resolución do 17/10/1936.

Neste procedemento condenaron á pena de morte a: Perfecto Abelairas Castro, Antonio Castedo Rubinos, Ramón García Núñez, Francisco Lamas López, Ángel Pérez López, José Ramos López e Rafael de Vega Barrera. Francisco Lamas e Antonio Castedo libráronse de ser fusilados.

Fusilado na mesma cidade luguesa ás 18:00 h do día 21 de outubro con outras cinco persoas.

Tamén o castigaron, de xeito mancomunado, ao pago dunha multa de 1.500.000 pesetas.