Jérez Rodríguez, Carmen

Leiteira. Compañeira de Abelardo Macías Fernández, Liebre. Veciña de Fervenza.

Militante da CNT.

Encarcerada. Executada.

Carmen pertencía a unha familia marcada pola represión franquista.

No ano 1944 era enlace da guerrilla antifranquista e tiña contacto con Consuelo Rodríguez López, Chelo.

O día 24/01/1944 detivérona os represores franquistas.

Xulgada no Tribunal Militar Territorial de Ourense na causa 75/44.

Presa en Ourense, acusárana de colaborar coa guerrilla despois de que a prenderan en Fervenza tras do combate no que morreu o fuxido Manuel Rodríguez Rodríguez.

Detida de novo o día 25/07/1946 na Fervenza por seis homes da Brigadilla de Servizos Especiais da Garda Civil de Ponferrada (León), disfrazados de guerrilleiros e que mandaba o tenente Gregorio González Villalaín. Ao non querer informar do paradoiro de Abelardo Macías, levárona presa á Rúa de Petín (Ourense), onde a mantiveron dous meses e despois trasladárona á prisión de Ponferrada (León). As forzas represoras quixeron facer crer ao pobo que todo fora obra dos homes do monte; a testemuña do seu veciño e enlace (logo guerrilleiro) Antonio López Núñez, Objetivo, clarexou as cousas.

O día 03/05/1947, nove meses despois da detención, apareceu morta nunha gabia en Montearenas, con dous tiros na cabeza. Os seus gardas violárona mentres a tiveron presa en múltiples ocasións e finalmente asasinárona; estaba en estado de catro meses por mor das moitas violacións que tivo que padecer.

O seu cadáver apareceu nunha cuneta xunto á tapia do cemiterio de Montearenas, lugar onde executaron e soterraron a moitos republicanos do Bierzo.