Lagares Gómez, Antonio

Labrego, sindicalista e político, 53 anos. Casado con Josefa García Pandelo; tiñan tres fillos: José, Ricardo e Manuel. Veciños da rúa Saavedra Meneses, 30A, en Betanzos. Nos últimos anos fora inspector de arbitrios municipais.

Membro da Agrupación Socialista (AS) de Betanzos, na que desenvolveu cargos directivos, sendo vogal en 1934 e depositario en 1936; organizador en 1931 da Cooperativa Socialista. Fundador de sociedades obreiras e agrarias na II República. Concelleiro na primeira corporación republicana en Betanzos no ano 1931.

Apoderado da Fronte Popular (FP) nas eleccións de febreiro de 1936.

Paseado.

Os franquistas prenderon a: Camilo Naveira Ferreño, CNT; Bernardo Miño Abelenda, PSOE; Antonio Lagares Gómez PSOE; Manuel Fernández Pérez, o Chacho, PCE, e Francisco Moreno Vilariño, PSOE. Leváronos á Coruña e notificáronlles que non había cargos contra deles.

Devolvéronos ao cuartel da Garda Civil de Betanzos. Ás 02:00 h conducíronos á caseta dos peóns camiñeiros de San Paio, no quilómetro 2 da estrada de Betanzos-Ferrol, onde os fusilaron sobre as 03:00 h. A Francisco Moreno Vilariño dérono por morto pero sobreviviu á masacre.

Morte rexistrada por mor de hemorraxia interna intracranial e cerebral.

O seu cadáver apareceu na Ponte San Paio, San Martiño de Tiobre, en Betanzos.

Soterrárono no cemiterio de Betanzos.