Miño Abelenda, Bernardo

Labrego, sindicalista e político, 70 anos. Casado con Antonia Santamarina; tiñan unha filla: Carmen. Veciños da 3ª travesía da rúa Travesa, 7, en Betanzos.

Foi director de El Pueblo.

Dirixente labrego desde 1900, considerárono o “Pablo Iglesias brigantino”. Concelleiro en 1909, procesárono por opoñerse nun pleno á Guerra de Marrocos. Era presidente da Agrupación Socialista (AS) de Betanzos cando se reorganizou esta en xullo de 1931 e que axudara a fundar en 1917. Concelleiro na primeira corporación republicana de Betanzos de 1931. Participou na creación de sindicatos afíns á UXT, fundou a Cooperativa Socialista e presidiu a Federación Labrega de Betanzos moitos anos. Candidato do PSOE pola Coruña nas eleccións xerais de 1933; non o elixiron.

Apoderado da Fronte Popular (FP) nas eleccións de febreiro de 1936.

Concelleiro de Betanzos en 1936, tamén polo PSOE, 2º tenente de alcalde, cando se produce o golpe de Estado sedicioso.

Tiña como compañeiros da Corporación de Betanzos de 1936, entre outras persoas, a: José-María Novo Rodríguez (alcalde en 1932), executado; Ramón Beade Méndez, encarcerado; Ricardo Bonome Seoane, fuxido; Tomás López da Torre, executado.

Paseado.

Prendérono os fascistas despois do golpe militar.

Morte rexistrada a causa dunha hemorraxia interna intra-torácica.

O seu cadáver apareceu na Ponte de San Paio, no quilómetro 2 da estrada Betanzos-Ferrol.

Os fascistas prenderon a: Camilo Naveira Ferreño, CNT; Bernardo Miño Abelenda, PSOE; Antonio Lagares Gómez, PSOE e capataz de arbitrios; Manuel Fernández Pérez, o Chacho, PCE, e Francisco Moreno Vilariño, PSOE. Leváronos á Coruña e notificáronlles que non había cargos contra deles.

Devoltos ao cuartel da Garda Civil de Betanzos para seren postos en “liberdade”; ás 02:00 h leváronos á caseta de San Paio, na estrada de Betanzos-Ferrol, e fusiláronos. Francisco Moreno Vilariño, ao que deran por morto, sobreviviu á masacre.

Na acta de defunción figura como varón de 70 anos e residencia na 3ª travesía da rúa Travesa, 7; morto en San Paio ás 03:00 h por mor dunha hemorraxia interna intracranial.

Soterrárono no cemiterio de Betanzos.

Por mor destes asasinatos abriuse unha causa no Xulgado de Betanzos.