Ramos Méndez, Ernesto

Carpinteiro, 38 anos. Veciño de Verín. Traballou durante 20 anos en Bilbao (Biscaia).

Membro da UXT e da Agrupación Socialista (AS) de Verín. Concelleiro da súa localidade en 1936.

Executado.

Despois do alzamento militar prendérono os franquistas e ingresárono na Prisión Provincial de Ourense.

Xulgado en consello de guerra en Ourense o día 21/05/1937 polo delito de rebelión militar, na causa 1021/36, co resultado de sentenza á pena de morte.

Fusilárono os golpistas no Campo de Aragón do Cuartel de San Francisco, en Ourense, con outras catro persoas.

Os asasinados nese día e lugar foron: Juan-Antonio Álvarez Diéguez, empregado e tenente de alcalde de Verín; Lino García Vázquez, comerciante e xornalista; Ernesto Ramos Méndez, carpinteiro e concelleiro de Verín; Carlos Reino Caamaño, médico e alcalde de Verín, e Sixto Salgado Fariñas, carpinteiro. A todos eles condenáronos á pena de morte no mesmo consello de guerra, acusados de ordenar a requisa de armas e a detención de persoas significativas das dereitas de Verín ao inicio do golpe militar.