Somoza Álvarez, Ramón-A.

Gandeiro, industrial e político, 37 anos. Solteiro. Veciño de Monforte de Lemos (Lugo).

Militante da Agrupación Socialista (AS) de Monforte de Lemos e da UXT. Concelleiro de Monforte de Lemos no ano 1931 e tamén na corporación de 1936, esta vez polo PSOE e dentro da coalición electoral da Fronte Popular (FP).

Detido o 24/09/1934 polo depósito de explosivos antes da folga xeral revolucionaria de outubro de 1934; condenárono a seis anos de cadea e liberárono o día 21/02/1936.

Despois do triunfo da FP, foi membro da xestora de Monforte de Lemos.

Paseado.

Participou na requisa de armas e no recrutamento de voluntarios para ir a Lugo na defensa da República.

Despois do triunfo dos golpistas agochouse no monte ata o día 11/07/1938, data na que o localizaron e detiveron con José Rodríguez Silvosa.

Ingresado no cárcere de Monforte de Lemos o mesmo día 11/07/1938.

Sacárono da cadea para comparecer no Goberno Civil de Lugo dous días despois da súa detención; asasinárono forzas da Garda Civil, durante o seu traslado, con José Rodríguez Silvosa.

No rexistro de defunción dise “debiendo tratarse de un homicidio, digo abundante hemorragia”.

Morte rexistrada ás 20:00 h “poco más o menos”.

Soterráronos aos dous nunha fosa común no cemiterio de Santiago de Castroncelos.

O seu cadáver apareceu en Seixo, Castroncelos. Aplicáronlles a Lei de Fugas axentes da Garda Civil dos postos de Monforte de Lemos e A Pobra do Brollón, que mandaba o sarxento do cuartel monfortino Manuel Fernández Vega, ao que acompañaban os gardas segundos Constantino Basteiro Sanfiz, Manuel Rodríguez Álvarez, Daniel Vázquez Rial e Pedro Díaz Díaz; este último do posto da Pobra do Brollón. Pedro Díaz e Constantino Basteiro foron os autores dos asasinatos nun suposto intento de fuxida dos detidos.

Por mor destes pasamentos o Tribunal Militar Territorial de Lugo incoou a causa 576/38, co resultado de sentenza de sobresemento provisorio segundo resolución do día 02/11/1938.