Vázquez Regueiro, Domingo

Empregado municipal. Casado con Concepción Grandío. Veciños da Coruña. Ferreiro forxador nos talleres municipais do Concello da Coruña.

Depurado.

Segundo o seu expediente informativo do Goberno Civil, foi un personaxe conflitivo nas súas relacións persoais, familiares e no traballo.

Destituído o día 21/09/1936 polo alcalde Fuciños por ser «un individuo perturbador del trabajo con manifiesto abuso de influencia cuando de ella dispone, desarrollando así una actividad netamente antipatriótica pues dificulta el buen funcionamiento de un servicio público», considerándoo incurso no art. 3º do Decreto 108 de 13/09/1936.

Solicitou, primeiro o 10/10/1936 diante da alcaldía e, despois, o 20/11/1936 diante do gobernador civil, a súa reposición no cargo alegando que na ditadura de Miguel Primo de Rivera Orbaneja fora membro da Unión Patriótica e, logo, da Unión Monárquica Nacional, que durante a República mantivo inimizade cos elementos progresistas do concello e que non estivo afiliado a ningún partido esquerdista, manifestándose simpatizante de Renovación Española RE) da que era membro a dona; a pesar das súas alegacións, non se lle tivo en consideración.

Seguiu insistindo e o 17/06/1937 enviou un novo escrito ao gobernador civil no que pedía a revisión do seu expediente mencionando os mesmos argumentos e sinalando que non fora cesado por desafecto; tampouco nesta ocasión se accedeu ao seu pedimento.