Aguilar-Tablada Tejón, Carlos

Militar, 35 anos. Casou en 1930 con Asunción Bastarreche del Carre; tiveron unha filla e un fillo: María-Asunción e Carlos. Ingresou como guardamarina no ano 1919 na Escola Naval Militar. Participou nas campañas de Marrocos. Alférez de fragata en 1921, alférez de navío en 1922, tenente de navío en 1926 e capitán de corveta en xaneiro de 1935. Nomeárono 3º comandante do acoirazado Jaime I.

Golpista. Morte en enfrontamento.

O comandante do Jaime I cando se produce o golpe de Estado era o capitán de navío Joaquín García del Valle, que non se puxo do lado dos rebeldes. Aguilar-Tablada era o oficial do buque máis afín ao levantamento militar e, aínda que gozaba de permiso, logrou embarcar en Vigo (Pontevedra) antes de que o barco saíra cara Cádiz por orde do Goberno republicano para facer fronte aos rebeldes.

O día 20 de xullo a mariñeiría leal decidiu tomar o barco diante das sospeitas de que os oficiais se puxeran do lado dos rebeldes e despois de recibir ordes desde o Goberno de Madrid.

Os oficias rebeldes Carlos Aguilar-Tablada Tejón, José Cañas Arce, José-María Otero Goyanes e Carlos Falquina García de Pruneda fixeron fronte coas súas armas desde a ponte do acoirazado; morreron Aguilar-Tablada e Cañas Arce e aos outros dous feríronos no enfrontamento. O seu corpo soterrárono no mar.