Alonso González, Consuelo

Vendedora de xornais, 38 anos. Casada con Ángel Pérez Muñoz, alguacil do Xulgado de Monforte de Lemos (Lugo); tiveron catro fillos. Veciños da rúa Abelardo Basante, 24, en Monforte de Lemos, onde chegaran en novembro de 1930 cando destinaran alí ao seu home.

O matrimonio sufriu represalias polas súas ideas políticas durante o Bienio Negro da II República; a Consuelo prendérona e a Ángel abríronlle un expediente por desacato.

Militante do PCE.

Executada. Sancionada.

Despois do golpe militar sufriu abusos por parte dos falanxistas, que a detiveron, castigaron e raparon a cabeza. Acusárona de facer propaganda da Fronte Popular (FP). Denunciárona un xefe da milicia de Falanxe e dúas mulleres, unha delas casada cun home que substituiría a Ángel Pérez como alguacil; acusárona de ter ideas comunistas, de manifestar alegría pola morte de José Calvo Sotelo e de Emilio Mola Vidal, de escoitar emisoras republicanas, de comentar noticias desfavorables aos sublevados e de recibir axuda do Socorro Rojo Internacional (SRI).

Ingresada na Prisión Provincial de Monforte de Lemos o día 29/12/1937. Trasladárona a Lugo o 09/02/1938 para sometela a xuízo.

Xulgada en consello de guerra en Lugo o día 14/02/1938 polo delito de rebelión militar con agravante, na causa 4/38, co resultado de sentenza á pena de morte segundo resolución do día 21/02/1938.

Os golpistas cualificárona de “peligrosísima, indeseable y perniciosa”.

Fusilárona os golpistas ás 06:00 h nas tapias do cuartel da Garda Civil en Lugo.

Morte rexistrada en Lugo por mor de feridas mortais na cabeza.

Foi a única muller executada en Lugo nesta funesta época.

En 1937 tamén lle iniciaron un expediente por responsabilidades políticas e condenárona en xullo de 1941 polo Tribunal Rexional de Responsabilidades Políticas da Coruña a unha sanción de 100 pesetas.