Barba Luis, Juan

Funcionario, 31 anos. Casou en 1928 con Juana Martínez Carreró, curmán do capitán golpista Antonio Carreró Vergés. Veciños de Vigo (Pontevedra). Mestre e ex-seminarista. Oficial técnico do Corpo de Telégrafos na capital viguesa desde 1925.

Na II República apoiou ao Partido Republicano Radical (PRR), aos centristas e aos socialistas, sin militancia en ningún destes grupos políticos. Logo sería Camisa Vella dos falanxistas.

Pertenceu ao Sindicato de Telecomunicacións.

Organizador da 1ª Volta Ciclista a Galicia, quedouse cos cartos recadados e non pagou a ninguén.

Colaboracionista.

O seu parentesco co capitán Cerveró semella que o involucrou nos preparativos previos á saída dos militares rebeldes ás rúas viguesas.

Participou co seu curmán político, desde o primeiro momento, nos episodios de “limpeza, pacificación e control”.

Manuel Hedilla Larrey encargouno, con outros, da organización falanxista na súa cidade. Desenvolveu a xefatura de Falanxe en Santa Cristina de Lavadores, Vigo.

Foi cruel co bando dos vencidos, detivo a moitos republicanos (inclusive compañeiros) no momento do golpe de Estado, participou na represión física e cometeu atropelos coas xentes das esquerdas, “misión que realicei cumpridamente” chegou a manifestar. Gañouse o odio de moita xente. A propia Falanxe acusouno de realizar negocios inmorais.

Expulsárono de Falanxe en xullo de 1937 e reingresou en xullo de 1941.

No ano 1943 a Fiscalía de Taxas sancionouno cunha multa de 5000 pesetas por tráfico ilegal de azucre. Tamén actuou de forma atentatoria contra da propia Falanxe con numerosos escritos de queixas de que o tiñan perseguido e desamparado dentro deste partido.