Bargueiras Gómez, José

Xastre, 25 anos. Veciño de Santiago de Reigosa, A Pastoriza.

Falanxista da Pastoriza.

Represor.

Miliciano da Falanxe da Pastoriza, que dirixía Baltasar Pérez, o Vinculeiro.

Actuou como represor en Ribadeo, A Pontenova, A Veiga, todas da provincia de Lugo, e en Ibias (Principado de Asturias). Adicouse ao asasinato de varios demócratas, á extorsión e aos roubos na compañía, polo menos, de José Fole Cordero, Manuel Fole Torrón, Divino Folgueiras López, Ángel Gómez Iglesias e José López Fernández.

O día 03/09/1936 asasinaron a Hipólito Veiga Novo.

O día 05/10/1936, como xefe das patrullas de Falanxe en Ibias, con outros descastados falanxistas, detiveron en San Martiño de Suarna, A Fonsagrada (Lugo), a José Valledor e a Antonio Álvarez Gómez; a este último asasinárono en Pena, Negueira de Muñiz (Lugo). A esta morte seguiron outras execucións de esquerdistas na Terra Chá luguesa. Tamén se adicou á venda dos obxectos persoais das súas vítimas.

O Tribunal Militar Territorial de Lugo abriu a causa 1175/36 polo pasamento de Álvarez Gómez co resultado de sobresemento provisorio.

Por tan “meritorios” actos os fascistas recompensárono cun posto na garda municipal de Lugo, onde se significou polas prácticas arbitrarias, os abusos de poder e os tratos de favor nas xestións das sancións de tráfico.

No ano 1965 acertou unha quiniela millonaria.