García-Aldave Mancebo, José

Militar, 60 anos. Ingresou na Academia Xeral Militar de Toledo en 1891 e licenciouse en 1894 como tenente segundo de Infantería. Veterano das guerras de Cuba e de Marrocos. En febreiro de 1932 acadou o grao de xeneral de brigada. En xullo de 1936 era comandante militar de Alacante, dentro da III División Orgánica e ao mando da 6ª Brigada de Infantería.

Golpista?. Axustizado.

Cando se produce o golpe de Estado, destinado en Alacante, non se sublevou contra o Goberno, ordenou o acuartelamento das tropas ao seu mando e mantivo unha posición indecisa, na espera do que decidise o seu superior, o xeneral e comandante en xefe da III División Orgánica Fernando Martínez-Monje Restoy, quen non se uniu á rebelión. Cando o día 20/07/1936 se entrevistou co presidente das Cortes, Diego Martínez Barrio, manifestou que era leal á República pero que nunca se poría enfronte dos seus "hermanos de armas" e que a súa posición era neutral.

Finalmente, pola súa dubidosa posición, prendérono as autoridades republicanas e recluírono no Hotel Samper.

Xulgado en consello de guerra por un tribunal militar polo delito de traizón co resultado de sentenza á pena de morte.

Executárono xunto con outros oito oficiais rebeldes en Alacante.