Liste Remuiñán, Jesús

Mestre e político, 26 anos. Veciño de Parada. Durante a II República exerceu como ensinante ou escolante, mestre do ferrado, dando clase na súa propia casa, no que se deu por denominar “escolas do ferrado”. A súa consigna era “máis escolas e menos igrexas”.

Membro do Sindicato Labrego Galego. Elixírono concelleiro de Ordes nas municipais de marzo de 1936 polo PSOE, dentro da coalición da Fronte Popular (FP), cargo que desenvolvía cando se produce o golpe de Estado.

Tiña como compañeiros na Corporación de Ordes de 1936, entre outras persoas, a: Pedro del Río Caramelo, encarcerado; José Areoso Vieites, encarcerado; Juan Ríos García, encarcerado; Pedro Álvarez Sánchez, sancionado.

Fuxido. Exiliado.

Xulgado en consello de guerra en Santiago de Compostela (A Coruña) polo delito de rebelión co resultado de ser declarado fuxido e en rebeldía.

Despois do triunfo dos sublevados perseguírono e mantívose seis anos escapado e agochado no monte; esta situación forzouno a marchar clandestinamente para Latinoamérica. Conseguiu fuxir, como mínimo unha vez, dos calabozos de Ordes. Volveu dez anos máis tarde.

Exiliado en Latinoamérica.