Mariño Méndez, Manuel

Tiña 54 anos. Veciño de Salvaterra de Miño (Pontevedra).

No ano 1913 participou na creación da Sociedade Labrega de Fiolledo, Oleiros e Salvaterra. Na ditadura de Miguel Primo de Rivera Orbaneja elixírono 1º tenente de alcalde da súa localidade o día 24/03/1924.

Alcalde de Salvaterra de Miño durante a II República, de 1931 a 1934, ano no que as dereitas destituíron a corporación. Recuperou o seu cargo despois das eleccións de febreiro de 1936, que gañou a Fronte Popular (FP), nas listaxes de Esquerda Republicana (ER). José Domínguez González foi o seu secretario particular e fusilárono os facciosos.

Artífice en xaneiro de 1933 da integración na UXT das sete sociedades agrarias da comarca.

Fuxido.

Cando se produce o golpe militar tentou que non houbese enfrontamentos na súa localidade e procurou calmar as masas. Despois escondeuse en San Salvador de Leirado, Salvaterra de Miño. Logrou pasar a Portugal o 05/08/1936 e prendérono en Monçao, Viana do Castelo (Portugal), dando cos seus osos nun penal de Lisboa.

Grazas á intervención do embaixador español puido acadar a zona republicana no buque Nyassa; chegou a Tarragona o día 10/10/1936 e loitou cos leais no V Rexemento de Infantería Almansa.

No ano 1939 atópase en Barcelona, onde recibe axuda desde Bos Aires (República Arxentina) para poder sobrevivir. Nese mesmo ano pasou a Francia e, logo, á República Arxentina.

Despois do indulto franquista para os que non tiveran delitos de sangue volveu a Fiolledo, no ano 1947, cando contaba 65 anos, e adicouse na súa terra natal ao traballo no campo.