Oliver Barcelona, Vicente

Mariñeiro, 26 anos. Veciño da Coruña. Engraxador no barco José Linares, que co Generoso, eran dous bous de parella coñecidos como os de Miguelín.

Membro do Sindicato da Industria Pesqueira (SIP) da Coruña, da CNT.

Fuxido.

Vicente era o contacto nestes barcos da tentativa de Fuga do Portiño nos dous barcos parella que se pretendía secuestrar para organizar a fuga duns 100 esquerdistas da Coruña (as fontes falan entre 80 e 115). O día 03/03/1937, pola mañá, deixou entrar nos barcos tres militantes de esquerdas, aos que agochou no interior dos dous barcos; a misión era facerse, con outras persoas, co control dos barcos e ir ao Portiño a recoller aos que tentaban a fuxida.

As investigacións posteriores ao intento do Portiño levaron ás forzas policiais á súa casa na Ronda de Nelle, onde con José Doldán Don fixeron fronte aos represores, fixéronse fortes no faiado e conseguiron fuxir polos tellados.

Xulgado en consello de guerra en Ferrol (A Coruña) polo delito de adhesión á rebelión co resultado de ser declarado fuxido e en rebeldía.