Outerelo Pereira, Antonio

Mariñeiro e sindicalista, 27 anos. Tiña unha filla, Dolores, do seu primeiro matrimonio; casado en segundas con Josefa Díaz, tiveron outros dous fillos: César e Antonio. Veciños da Coruña.

Militante da CNT e do Sindicato da Industria Pesqueira (SIP) da Coruña El Despertar Marítimo.

Fuxido. Encarcerado.

Foxe o día 4 de outubro de 1936 no vapor Sagrado Corazón de Jesús da Coruña cara Xixón (Principado de Asturias); fuxida de 16 persoas das Xuventudes Libertarias (XXLL) e do Sindicato da Industria Pesqueira (SIP) da Coruña.

Entre os fuxidos atopábanse os veciños da Coruña e militantes da CNT: José Cambeiro Casais, mariñeiro; Leandro Correa Contabitarte, fogueiro; Manuel Mourelle Lema, mariñeiro; Eduardo-Julio-Alberto Naya Cardama, dependente; Antonio Outerelo Pereira, mariñeiro, e César Palleiro Freire, mecánico e carboeiro.

Xulgado en consello de guerra en Ferrol (A Coruña) polo delito de rebelión militar co resultado de ser declarado fuxido e en rebeldía.

No Principado de Asturias mantívose embarcado ata febreiro ou marzo de 1937, cando se incorporou á 3ª Compañía do 207º Batallón republicano. Militante da Agrupación Confederal Galaica.

Detido polos golpistas en 1939 e trasladado ao Campo de Concentración de Camposancos, A Guarda (Pontevedra). Logo incorporárono ao Batallón de Traballadores nº 149 (BB.TT.) de Castejón (Navarra).

Xulgado en consello de guerra en abril de 1941 co resultado de sentenza a cadea perpetua.

Internárono na Prisión Provincial da Coruña e indultárono no ano 1947.

Foi tesoureiro do Comité Rexional da CNT na clandestinidade e, cando o reclamou o Xulgado Militar de Vigo (Pontevedra) en xullo de 1947, foxe.

Pereceu no naufraxio na ría de Cedeira cando era patrón do 2º Monte San Pedro.