Pardo Argüeso, Manuel

Tiña 16 anos. Fillo de Celsa Argüeso Pardo, asasinada polos fascistas o 01/03/1948 en Bergondo. Irmán de Andrés-Antonio Pardo Argüeso que morreu no intento de fuga da prisión de San Cristóbal, Pamplona (Navarra) o día 06/06/1938.

Morte en enfrontamento.

A Manuel ferírono no intercambio de tiros na taberna de Domingo Bermúdez, no lugar da Igrexa de Oroso, o día 08/01/1948, despois de disparar e matar ao brigada de Artillería Juan Raña Martínez. Manuel faleceu unhas horas despois do tiroteo e o seu corpo abandonárono os seus compañeiros no monte Puzos, preto de Oroso.

Segundo o informe da Garda Civil, o corpo atopado pertencía a un home duns 25 a 30 anos de pelo castaño, ollos verde azuis claro, nariz pequena e unha talla de 1,70 m; vestía con xersei de punto cor granate, camisa a raias azuis, camisola de punto, pantalón de pano gris e calcetíns negros novos e calzón curto, de complexión forte. Xunto co cadáver a Garda Civil entregou ao xuíz instrutor unha pistola marca Llama, do nove mm curto, número 44359, un cargador, tres cartuchos e varias vainas, unha gabardina, boina negra e dous cartuchos do nove longo.

Soterrárono nunha fosa común no cemiterio de Oroso, sen identificar. Días despois o xulgado militar comunicou que o cadáver se identificara como o de Manuel Pardo.

En represalia pola morte do militar Juan Raña, o día 01/03/1948, os franquistas asasinaron en Bergondo a Celsa Argüeso Pardo, a nai de Manuel.