Pousa Antelo, Avelino-Celso

Mestre, intelectual e xornalista, 22 anos. Veciño de Seoane, Barcala. Irmán de Ramón-José-Manuel Pousa Antelo, procesado. Acadou o título de mestre no ano 1935.

Nos anos trinta colaborou con La Voz de Barcala, órgano da Federación Agropecuaria de Nereira (A Coruña).

Militante e líder da poderosa agrupación do Partido Galeguista (PG) na Baña na que ingresa en xuño de 1931 nas Mocidades Galeguistas e na que tamén figuraba Erundino Vieito Baña.

No ano 1936 fixo campaña a favor do Estatuto de Autonomía de Galicia (EAG).

Procesado. Depurado

Cando comeza o alzamento estaba a facer o servizo militar nun rexemento de Ceuta e, neses intres, de permiso na súa casa para presentarse a unhas oposicións de Maxisterio. Tivo que encargarse da requisa de armas, que entregou no concello. Tentou pasou a Portugal co seu irmán Ramón, vía Ourense.

Despois duns días preséntase na Coruña e envíano á fronte de guerra na Serra do Guadarrama; tentou pasar á zona republicana pero non puido. Rematou a guerra como sarxento de Sanidade e tocoulle participar na toma de Madrid.

Xulgado en consello de guerra en Santiago de Compostela (A Coruña) polo delito de rebelión, librou da cadea por estar incorporado ao exército franquista e non volve a figurar no proceso.

Depurado como mestre, volveu exercer en Lugo no ano 1944.